Müraciətlərin baxılmaq üçün qanunazidd hərəkətlərindən (hərəkətsizliyindən) şikayət edilən orqanlara və ya vəzifəli şəxslərə göndərilməsinə yol verilməsin.

Bu qadağaya görə müraciəti aidiyyəti üzrə göndərmək mümkün olmadıqda, müraciət müəllifinə qanunla müəyyən edilmiş qaydada məhkəməyə müraciət etmək hüququ izah olunsun.

Zəruri hallarda bu növ müraciətlərin müəlliflərinə müvafiq qanunvericiliyin tələblərinin və müraciət etmə qaydasının izahını nəzərdə tutan yazılı cavabların göndərilməsi (şəxsi qəbul zamanı isə şifahi izahların verilməsi) təmin edilsin.

Həlli prokurorluğun səlahiyyətlərinə aid olmayan müraciətlərin aidiyyəti üzrə göndərilməsi və onların müəlliflərinə izahlı cavabların verilməsi Baş Prokurorluqda Müraciətlərə baxılması idarəsi, Azərbaycan Respublikasının Baş prokuroru yanında Korrupsiyaya qarşı Mübarizə Baş İdarəsində Təşkilati və informasiya təminatı idarəsi, Azərbaycan Respublikasının Hərbi, Naxçıvan Muxtar Respublikası və Bakı şəhər prokurorluqlarında isə Müraciətlərə baxılması şöbələri tərəfindən həyata keçirilsin. Müraciət müəlliflərinə göndərilən cavablar göstərilən struktur qurumların rəhbərləri (onların müavinləri) tərəfindən imzalansın.

Naxçıvan Muxtar Respublikasının Hərbi Prokurorluğuna daxil olmuş bu qəbildən olan müraciətlərə cavabların verilməsi həmin qurumun rəhbərinin müəyyən etdiyi qaydada onun müvafiq köməkçisi tərəfindən təmin olunsun.

Rayon (şəhər) və ərazi hərbi prokurorluqlarına daxil olmuş göstərilən növ müraciətlər müvafiq prokurorlar və ya onların müavinləri tərəfindən cavablandırılsın.

Müraciətdə göstərilən məsələlər “Dövlət sirri haqqında” Azərbaycan Respublikasının Qanununa uyğun olaraq dövlət sirri təşkil edən məlumatlara və ya qanunla qorunan digər məlumatlara aid edildikdə, müraciətin bu səbəbdən mahiyyəti üzrə cavablandırılmasının mümkünsüzlüyü barədə müraciət edənə məlumat verilsin.

Prokurorluq orqanları rəhbərlərinin şəxsi qəbulu zamanı verilmiş müraciətlərə baxılmasının nəticələri və qəbul olunmuş qərarlar barədə cavablar həmin rəhbər vəzifəli şəxslər tərəfindən verilsin.

Prokuror müavinlərinin daxil olmuş müraciətlər üzrə qəbul etdikləri qərarlardan verilmiş şikayətlərə müvafiq prokurorlar tərəfindən baxılsın və şikayətçilərə cavab verilsin.

Naxçıvan Muxtar Respublikası, Naxçıvan Muxtar Respublikasının Hərbi və Bakı şəhər prokurorları tərəfindən müraciətlər üzrə qəbul olunmuş qərarlara dair şikayətlərə Baş prokurorun müvafiq müavinləri tərəfindən baxılsın və müraciət müəlliflərinə cavablar onların imzaları ilə verilsin.

Prokuror müavinlərinin qərarlarından edilmiş şikayətlərə müvafiq prokurorlar tərəfindən baxılsın.

Rayon (şəhər) və ərazi hərbi prokurorlarının daxil olmuş müraciətlərə dair qəbul etdikləri qərarlardan verilmiş şikayətlərə bu əmrdə müəyyən olunmuş qaydada müvafiq yuxarı prokurorluqlarda baxılsın.

Bir qayda olaraq, Baş prokuror tərəfindən ayda bir, Baş prokurorun müavinləri tərəfindən isə ayda iki dəfədən az olmayaraq vətəndaşların qəbulu keçirilsin.

Naxçıvan Muxtar Respublikası, Naxçıvan Muxtar Respublikasının Hərbi və Bakı şəhər prokurorları həftədə bir, rayon (şəhər) və ərazi hərbi prokurorları isə həftədə iki dəfədən az olmayaraq vətəndaşları şəxsən qəbul etsinlər.

Vətəndaşların müraciətləri ilə əlaqədar təxirəsalınmaz tədbirlərin görülməsi tələb edildikdə, onların dərhal qəbul edilməsi təmin edilsin.

Prokurorluq orqanlarının rəhbərləri, onların müavinləri, müvafiq idarə (şöbə) rəisləri və idarə (şöbə) rəislərinin müavinləri şəxsi qəbuldan daxil olmuş müraciətləri nəzarətə götürməklə həmin müraciətlərin vaxtında qanuni həll olunmasını və bu barədə onların müəlliflərinə ətraflı cavabların verilməsini təmin etsinlər.

İdarə (şöbə) prokurorları tərəfindən qəbul edildikdən sonra şikayətləri üzrə qəbul olunmuş qərarlardan narazı qalmış vətəndaşlar müvafiq idarələrin (şöbələrin) rəis müavinləri (idarədə və ya şöbədə belə ştat vahidi olmadıqda, idarə (şöbə) rəisləri), bundan sonra qəbul olunmuş qərarlardan şikayət edən şəxslər isə idarə (şöbə) rəisləri tərəfindən qəbul olunsun.

Müraciətləri mühüm əhəmiyyət kəsb edən şikayətçilərin bilavasitə idarə (şöbə) rəisləri və ya onların müavinləri tərəfindən qəbul olunması təmin edilsin.

Müraciətləri xüsusilə mühüm əhəmiyyət kəsb edən şikayətçilərin, habelə idarə (şöbə) rəisləri tərəfindən qəbul edildikdən sonra şikayətləri təmin edilməmiş vətəndaşların müvafiq prokurorların müavinləri, bundan sonra müraciətləri üzrə qəbul olunmuş qərarlardan şikayət edən şəxslərin isə müvafiq prokurorlar tərəfindən qəbul edilməsi təmin olunsun.

Müraciətləri mühüm əhəmiyyət kəsb edən şikayətçilərin bilavasitə Azərbaycan Respublikasının Baş prokuroru yanında Korrupsiyaya qarşı Mübarizə Baş İdarəsinin rəhbərliyi tərəfindən qəbul olunması təmin edilsin.

Rayon (şəhər) və ərazi hərbi prokurorluqlarında vətəndaşların qəbulu işinin səmərəliliyinin artırılması məqsədilə, prokurorluğun əməkdaşları arasında aparılan vəzifə bölgüsü zamanı bu işin təşkilinə məsul olan müvafiq prokuror köməkçisinin müəyyən edilməsi təmin olunsun.