Sayt üzrə axtarış

















Əsas səhifə / MƏTBUAT XİDMƏTİ

2014-05-25
Azərbaycan Respublikası Baş Prokurorluğunun Mətbuat xidmətinin məlumatı

Mayın 24-də, saat 20 radələrində Xaçmaz rayonunun Nabran kəndi yaxınlığındakı meşə massivində Xaçmaz şəhər sakini, 1998-ci il təvəllüdlü Quliyev Vasif Yaşar oğlunun meyitinin ağacdan asılmış vəziyyətdə, təxminən 25 metr aralıda yerdə isə rayonun Hacıqurban-oba kənd sakini, 1997-ci il təvəllüdlü Tağıyeva Nərgiz Nurməmməd qızının meyiti aşkar olunmuşdur.

Rayon Polis Şöbəsindən daxil olmuş həmin məlumat əsasında rayon prokurorluğu və rayon Polis Şöbəsinin əməkdaşları dərhal hadisə yerinə gedərək hadisə yerinə və meyitlərə məhkəmə-tibb ekspertinin iştirakı ilə baxış keçirmişlər. Baxış zamanı hər iki meyitin boyun nahiyyəsində stranqulyasiya şırımları və qollarında kəsilmiş yaralar, hadisə yerində isə butulka şüşəsinin qırılmış hissələri aşkar edilmişdir.

Həmin faktla bağlı rayon prokurorluğunda Cinayət Məcəlləsinin 120.1 (qəsdən adam öldürmə) və 125-ci (özünü öldürmə həddinə çatdırma) maddələri ilə cinayət işi başlanmışdır. İş üzrə ölümün səbəblərinin müəyyənləşdirilməsi məqsədilə məhkəmə-tibbi ekspertizaları təyin edilmişdir.

İlkin istintaqla müəyyən edilmişdir ki, V.Quliyev ilə N.Tağıyeva Xaçmaz şəhəri 2 saylı tam orta məktəbdə paralel siniflərdə təhsil almaqla son bir ildə bir-birilərini sevmişlər. Lakin 2 ay əvvəl N.Tağıyeva Ukraynada yaşayan qohumuna nişanlandığından son günlərdə onların hər ikisi intihar etmək barədə sinif yoldaşlarına bu barədə bildirmişlər. Hadisədən bir neçə saat əvvəl V.Quliyev və N.Tağıyeva sonuncunun sinif yoldaşı Amin Əlipaşayevlə qeyd edilən meşə massivinə getmişlər. Özlərini intihar etmək üçün qollarını şüşə parçası ilə kəsən zaman yanlarında olan A.Əlipaşayev onları bu hərəkətdən daşındırmaq məqsədilə o da öz növbəsində qoluna xəsarət yetirmişdir. Lakin V.Quliyev və N.Tağıyeva aldadaraq onu evlərinə yola salmış və bundan sonra qəti olaraq intihar yoluna əl atmışlar.

İlkin fərziyyəyə görə V.Quliyev özündə olan bel kəməri ilə əvvəlcə N.Tağıyevanı boğaraq qəsdən öldürmüş, daha sonra isə həmin kəmərlə özünü ağacdan asaraq intihar etmişdir.

Hazırda cinayət işi üzrə istintaq tədbirləri davam etdirilir.