Sayt üzrə axtarış

















Əsas səhifə / XƏBƏRLƏR

2015-02-26
Valyuta mübadilə şöbələrində aşkar edilmiş qanun pozuntularına qarşı kəsərli mübarizə tədbirləri davam etdirilir

Azərbaycan Respublikasının Mərkəzi Bankından xarici valyuta nağd alqı-satqı məzənnələrinin müəyyənləşdirilməsi zamanı bəzi valyuta mübadilə şöbələrində, habelə bir sıra subyektlər tərəfindən valyuta qanunvericiliyinin tələblərinin pozulması barədə daxil olmuş məlumat, eyni zamanda  son günlər ayrı-ayrı vətəndaşların xarici valyutanın alqı-satqısı zamanı sui-istifadə hallarına yol verilməsi barədə çoxsaylı müraciətləri əsasında Baş prokuror yanında Korrupsiyaya qarşı Mübarizə Baş İdarəsi tərəfindən təxirəsalınmaz istintaq-əməliyyat tədbirləri həyata keçirilmişdir.

İlkin araşdırmalar göstərmişdir ki, Azərbaycan Respublikası Mərkəzi Bankı İdarə Heyətinin 21 fevral 2015-ci il tarixli qərarı ilə 1 ABŞ dollarının rəsmi məzənnəsi 1,05 manat səviyyəsində müəyyən edildikdən sonra xarici valyutanın alqı-satqı əməliyyatlarının həcminin artması ilə əlaqədar bir sıra valyuta dəyişmə şöbələrində, eyni zamanda qanunsuz fəaliyyət göstərən bəzi subyektlər tərəfindən yol verilmiş sistemli  və məqsədli qanun pozuntuları əhalinin aldadılması, əsassız ajiotajın yaranması və bu sahədə vəziyyətin gərginləşməsinə səbəb olmuşdur.

Belə ki, həyata keçirilmiş istintaq və əməliyyat-axtarış tədbirləri ilə xarici valyuta bazarında fəaliyyət göstərən bir sıra valyuta mübadilə şöbələri tərəfindən valyuta alqı-satqı əməliyyatlarının məqsədli şəkildə müvəqqəti dayandırılması, bəziləri tərəfindən milli pulun olmaması bəhanəsi ilə belə əməliyyatlardan əsassız olaraq imtina edilməsi, habelə bəzi valyuta mübadilə şöbələri tərəfindən xarici valyutanın, xüsusən də ABŞ dollarının Mərkəzi Bankın İdarə Heyətinin müəyyən etdiyi səviyyədən xeyli aşağı məzənnə ilə alınması halları aşkar edilmişdir.

Bakı şəhərində müxtəlif ünvanlarda müvafiq icazə tələb olunduğu halda belə icazə alınmadan qanunsuz sahibkarlıq fəaliyyəti göstərməklə sistemli şəkildə rəsmi qaydada müəyyən edilmiş məzənnədən xeyli aşağı qiymətlə xarici valyuta mübadiləsini həyata keçirməklə vətəndaşların əmlakını aldatma yolu ilə ələ keçirən bir sıra qanunsuz fəaliyyət göstərən valyuta mübadilə şöbələrində istintaq-əməliyyat tədbirləri həyata keçirilməklə onlardan 15-də istintaq üçün əhəmiyyət kəsb edən sənəd və əşyalar, milli və xarici valyutada pul vəsaitləri aşkar edilərək götürülmüşdür.

Qeyd olunan faktlarla əlaqədar Baş prokuror yanında Korrupsiyaya qarşı Mübarizə Baş İdarəsində Cinayət Məcəlləsinin 178.2.3 (qulluq mövqeyindən istifadə etməklə dələduzluq) və 192.1 (qanunsuz sahibkarlıq) maddələri ilə 6 cinayət işi başlanmış, 5 şəxs bilavasitə cinayət başında yaxalanmışdır.

Belə ki, Mərkəzi Bankın müəyyən etdiyi xarici valyuta məzənnəsinə zidd olaraq “Yunayted Kredit Bank” ASC-dən müvafiq lisenziya almış Emil Həsənovun Bakı şəhəri, Ağa Nemətulla küçəsi 32 saylı ünvanda yerləşən valyuta dəyişmə məntəqəsində, “Zaminbank” ASC-dən müvafiq lisenziya almış Rəşad Baxşıyevin Bakı şəhəri, 28 may küçəsi 25 saylı ünvanda yerləşən valyuta dəyişmə məntəqəsində vətəndaşlara məxsus xarici valyutanı manata mübadilə etməklə qulluq mövqeyindən istifadə etməklə özgə əmlakını ələ keçirmələrində, eyni zamanda müvafiq lisenziya almadan Zülfüqar Həsənovun Bakı şəhəri, Atatürk prospekti 97-105 saylı ünvanda yerləşən valyuta dəyişmə məntəqəsində, Arif İsmayılovun Bakı şəhəri, Q.Qarayev prospekti 65D saylı ünvanda yerləşən valyuta dəyişmə məntəqəsində, Sənan Kəlbəliyevin Bakı şəhəri, M.Mirqafarov küçəsi 14 saylı ünvanda yerləşən valyuta dəyişmə məntəqəsində vətəndaşlara məxsus xarici valyutanı manata mübadilə edərək qanunsuz sahibkarlıq fəaliyyəti ilə məşğul olmaları və qulluq mövqeyindən istifadə etməklə özgə əmlakını ələ keçirmələrində şübhələr üçün əsaslar olduğundan Zülfüqar Həsənova, Rəşad Baxşıyevə, Sənan Kəlbəliyevə  Cinayət Məcəlləsinin 178.2.3-cü, 192.2.2-ci maddələri, Arif İsmayılova 178.2.3 və 192.2.1-ci maddələri, Emil Həsənova isə 178.2.3-cü maddəsi ilə ittiham elan edilməklə barələrində məhkəmənin qərarı ilə həbs qətimkan tədbiri seçilmişdir.

Hazırda həmin cinayət işləri üzrə, habelə Bakı şəhəri və regionlarda sui-istifadə hallarına yol verməklə valyuta və makroiqtisadi tənzimləməyə ciddi maneələr yaradaraq əhalinin aldadılmasına və süni gərginliyin yaradılmasına səbəb olan subyektlərin aşkar edilməsi, belə halların aradan qaldırılması istiqamətində təxirəsalınmaz istintaq-əməliyyat tədbirləri davam etdirilir.

Baş Prokurorluq tərəfindən bundan sonra da Mərkəzi Bank ilə əlaqəli şəkildə valyuta qanunvericiliyinə, xüsusilə də xarici valyutanın nağd alqı-satqı əməliyyatlarının aparılması zamanı mövcud tələblərin pozulması hallarına qarşı kəsərli mübarizə tədbirlərinin görülməsi təmin ediləcəkdir.