Sayt üzrə axtarış

















Əsas səhifə / XƏBƏRLƏR

2011-04-08
Azərbaycan Respublikası prokurorluğu orqanlarına işə qəbulla əlaqədar sənədlərin qəbulu davam etdirilir

     Azərbaycan Respublikası Prezidentinin 2001-ci il 19 iyul tarixli Fərmanı ilə təsdiq edilmiş «Prokurorluğa işə qəbul olunmaq üçün namizədlərlə müsabiqə keçirilməsi qaydaları haqqında» Əsasnaməyə uyğun olaraq, Azərbaycan Respublikası Baş Prokurorluğu tərəfindən  2011-ci il yanvarın 6-da vakant olan 100 ştat vahidi üzrə elan olunmuş müsabiqə ilə əlaqədar sənədlərin qəbulu davam etdirilir.

     Xalqımızın ümummilli lideri Heydər Əliyevin siyasi iradəsinə müvafiq olaraq 2002-ci ildən tətbiqinə başlanılan, Azərbaycan Respublikasının Prezidenti cənab İlham Əliyevin rəhbərliyi altında ölkəmizdə reallaşdırılan dövlət gənclər siyasəti çərçivəsində daha da geniş vüsət alan prokurorluq orqanlarında  müsabiqə yolu ilə işə qəbulun həyata keçirilməsi kadr korpusunun  şəffaf prosedurlar əsasında formalaşmasının ən sivil və demokratik yoludur. Bu yolla həyata keçirilən  işə qəbul prokurorluğun kadr tərkibinin hərtərəfli savadlı və yüksək mənəvi keyfiyyətlərə malik, vətənpərvərliyi və dövlətçilik ideyalarına sədaqətləri ilə seçilən gənc mütəxəssislər hesabına komplektləşdirilməsi üçün geniş imkanlar yaratmış, ölkə həyatının bütün sahələrində gənclərin əməyindən hərtərəfli istifadə olunması barədə Dövlət başçısı cənab İlham Əliyevin verdiyi tapşırıqların icrası yolunda mühüm vasitə olmuşdur.

     2002-ci ildən başlayaraq, tam aşkarlıq şəraitində və  şəffaf prosedurlar əsasında, ictimaiyyətin, qeyri-hökumət və beynəlxalq təşkilatların, xarici dövlətlərin ölkəmizdəki səfirliklərinin və kütləvi informasiya vasitələri nümayəndələrinin  iştirakı ilə  keçirilmiş müsabiqələr nəticəsində prokurorluqda qulluğa qəbul edilməklə hazırda mövcud kadr korpusunun 41 faizini təşkil edən gənc mütəxəssislər təyinat aldıqları müxtəlif vəzifələrdə səmərəli fəaliyyət göstərirlər. Xidmətdə fərqləndiklərinə və vəzifə borclarını nümunəvi icra etdiklərinə görə artıq  həmin gənclərin 60-dan çoxu Azərbaycan Respublikası Prokurorluğunun Mərkəzi aparatında məsul vəzifələrə irəli çəkilmişlər.

     Bu ənənə davam etdirilməklə, cari ilin yanvar ayında Baş Prokurorluq tərəfindən vakant vəzifələrin hərtərəfli hazırlıqlı gənc mütəxəssislər hesabına  komplektləşdirilməsi məqsədilə elan edilmiş növbəti - prokurorluq üzrə sayca 10-cu müsabiqə ilə əlaqədar hazırda sənədlərin qəbulu həyata keçirilir və bu proses aprel ayının 29-na kimi davam etdiriləcəkdir. Sənədlərin qəbulu başa çatdırıldıqdan sonra test imtahanının vaxtı və yeri, imtahan sualları toplusunun əldə olunması qaydası, toplunun hazırlanmasında istifadə olunan normativ aktların siyahısı və digər məsələlər barədə mətbuat vasitəsilə, həmçinin Baş Prokurorluğunun internet səhifəsində və Qəbul otağında yerləşdirilmiş lövhədə əlavə məlumat veriləcəkdir.

     Prokurorluq orqanlarında işləmək arzusunda  olan hər bir gənc hüquqşünas Azərbaycan Respublikası Baş Prokurorluğuna müraciət edərək tələb olunan sənədləri təqdim etməklə müsabiqədə iştirak edə bilər. Qulluğa qəbulla bağlı tələb olunan sənədlərin siyahısı və digər aidiyyatı məsələlərlə əlaqədar prokurorluğun internet səhifəsində (www.genprosecutor.gov.az) və 492-62-23, 437-28-56, 492-74-32, 492-39-95 nömrəli telefonlar vasitəsi ilə zəruri məlumatları  əldə etmək olar.