Sayt üzrə axtarış

















Əsas səhifə / XƏBƏRLƏR

2012-04-24
Müəssisə rəhbərinin cinayətkar əməllərinin qarşısı alınmışdır

     "Meyniman-1" Məhdud Məsuliyyətli Cəmiyyətin rəhbəri Həmidxan Mürvətovun qanunsuz hərəkətləri barədə "Meliorasiya və Su Təsərrüfatı" Açıq Səhmdar Cəmiyyətindən daxil olmuş məlumat Baş prokuror yanında Korrupsiyaya qarşı mübarizə idarəsində araşdırılmışdır.

     Müəyyən edilmişdir ki, H.Mürvətov Əmlak Məsələləri Dövlət Komitəsinin mövcud olmayan 9 fevral 2012-ci il tarixli sərəncamını əsas kimi götürərək Göyçay rayonunun Qaraməryəm kəndi ərazisində 96 min manat dəyərində 10 km uzunluğunda istifadə olunmayan və istifadəyə yararsız su kəməri xəttinin rəhbərlik etdiyi cəmiyyət tərəfindən sökülərək metal qəbulu məntəqəsinə təhvil verilməsi barədə Əmlak Məsələləri Dövlət Komitəsi ilə guya razılığa gəlmələri barədə 15 fevral 2012-ci il tarixli saxta alqı-satqı müqaviləsi hazırlamışdır.

     Boru kəmərləri Göyçay suvarma sistemləri idarəsinin balansında olduğundan planlaşdırdığı ağır cinayəti həyata keçirmək məqsədilə H.Mürvətov həmin müqaviləni qeyd edilən idarəyə təqdim etməklə kəmərin Əmlak Məsələləri Dövlət Komitəsi tərəfindən guya ona satıldığını və söküb aparacağını bildirmişdir. Bundan sonra H.Mürvətov işin texniki cəhətdən həyata keçirilməsi üçün hazırlıqlar görərək metalın kəsilməsində istifadə olunacaq avadanlıq və texnikanı Qaraməryəm kənd sakini Quliyev İlqar Ağaqulu oğlunun həyətinə gətirərək külli miqdara özgə əmlakını ələ keçirməyə cəhd etmişdir.

    Fakta görə Cinayət Məcəlləsinin 29, 178.2.3, 178.3.2-ci (dələduzluq yolu ilə qulluq mövqeyindən istifadə etməklə külli miqdarda özgə əmlakını ələ keçirməyə cəhd) və 313-cü (vəzifə saxtakarlığı) maddələri ilə cinayət işi başlanmışdır.

     Hazırda cinayət işi üzrə istintaq davam etdirilir.