Sayt üzrə axtarış

















Əsas səhifə / XƏBƏRLƏR

2013-08-28
Baş Prokurorluğun əməkdaşı BMT-nin Korrupsiya əleyhinə Konvensiyasının müddəalarının icrası ilə bağlı beynəlxalq tədbirlərdə fəal iştirak edir

Azərbaycan Respublikasında BMT-nin Korrupsiya əleyhinə Konvensiyasının bir sıra müddəalarının icrası ilə bağlı 1-ci raund dəyərləndirilməsi uğurla həyata keçirilmişdir. BMT-nin Narkotiklər və Cinayətkarllğa qarşı mübarizə idarəsinin dəstəyi ilə Bosniya və Herseqovina, eyni zamanda Qvatemalanın ekspertləri Azərbaycan Respublikasında Korrupsiyanın kriminallaşdırılması və beynəlxalq hüquqi əməkdaşlıq məsələləri sahəsində qiymətləndirmə apararaq, konvensiyanın həmin hissəsinin implementasiyası üçün görülən işləri qənaətbəxş hesab etmişdir. Azərbaycan üzrə hesabatın icmalı BMT üzv dövlətləri arasında yayılaraq ölkəmizin müsbət iş təcrübəsi dünya ictimaiyyətinin diqqətinə çatdırılmışdır. 

Konvensiyanın İmplementasiya üzrə Nəzarət Qrupunun sessiyasında qəbul edilmiş qərarla Azərbaycan və Peru Meksika Birləşmiş Ştatları üzrə dəyərləndirici dövlət seçilmişdir. 

18 - 22 avqust 2013-cü il tarixlərdə Azərbaycan Respublikasının Baş prokuroru yanında Korrupsiyaya qarşı mübarizə idarəsinin böyük prokuroru Elnur Musayev Beynəlxalq Ekspertlər Qrupu tərkibində Mexiko şəhərində Dəyərləndirmə iclasında iştirak etmişdir. 

Beynəlxalq Ekspert Heyəti Meksikanın bir sıra ali qurumları, o cümlədən Parlament, Ali Məhkəmə, Baş Prokurorluq, Ədliyyə nazirliyi, Dövlət İşləri üzrə nazirlik, Maliyyə Kəşfiyyatı Qurumu, Maliyyə nazirliyi və sair qurumlarının nümayəndləri ilə görüşlər keçirmişlər. 

Azərbaycan Respublikasının Meksikadakı fövqəladə və səlahiyyətli səfiri İlqar Muxtarov açılış sessiyasında iştirak edərək ölkələrimiz arasında münasibətlərin daha da inkişaf etdirilməsinə öz dəstəyini ifadə etmişdir. 

Tədbirdə Meksika hökumətinin özünüdəyərləndirmə toplusuna hazırladığı cavablar Azərbaycan mütəxəssisi - Baş prokuror yanında Korrupsiyaya qarşı mübarizə idarəsinin böyük prokuroru Elnur Musayev tərəfindən öyrənilərək qiymətləndirilmiş, cavabdeh ölkəyə eskpert rəylərinin layihələri təqdim olunmuşdur. İş bölgüsünə əsasən korrupsiyanın kriminallaşdırılması, hüquq mühafizə qurumları, əmlak üzərinə həbs qoyulması və müsadirə, cinayət təqibindən immunitet, hüquqi şəxslərin korrupsiya cinayətlərinə görə məsuliyyəti, sübutetmə və sair məsələlər üzrə Meksika qanunvericiliyinin və təcrübəsinin beynəlxalq tələblərə cavab verməsinin qiymətləndirilməsini həyata keçirən azərbaycanlı mütəxəssis sözü gedən prosesdə aparıcı rol oynamışdır. 

Səfər çərçivəsində beynəlxalq ekspertlər korrupsiyaya qarşı mübarizə və BMT Konvensiyasının implementasiyası ilə əlaqədar səmərəli fikir mübadiləsi aparmışdır.