Sayt üzrə axtarış

















Əsas səhifə / XƏBƏRLƏR

2013-05-16
Özlərini Baş prokuror yanında Korrupsiyaya qarşı mübarizə idarəsinin əməkdaşları kimi təqdim etmiş şəxslər cinayət başında yaxalanmışlar

 Bakı şəhəri 36 saylı Texniki yaradıcılıq mərkəzinin direktoru Dilarə Əliyevanın Baş prokuror yanında Korrupsiyaya qarşı mübarizə idarəsinin 161 saylı “Qaynar xətt” əlaqə mərkəzinə daxil olmuş müraciəti üzrə təxirəsalınmaz əməliyyat-istintaq tədbirləri həyata keçirilmişdir. 

Müəyyən edilmişdir ki, 7 may 2013-cü il tarixdə “Korrupsiya və bəşəriyyət” qəzetinin müxbiri Xəyyam Qurbanlı və həmin qəzetin şöbə müdiri Rizvan Mirmövsümov Bakı şəhəri, Çobanzadə küçəsi 49 saylı ünvanda yerləşən 36 saylı Texniki yaradıcılıq mərkəzinə gələrək özlərini Baş prokuror yanında Korrupsiyaya qarşı mübarizə idarəsinin əməkdaşları kimi təqdim etmişlər. Bundan sonra mərkəzdə yoxlama apacaqlarını bildirərək orada ayrı-ayrı sənədlərin fotoşəkillərini çəkmiş və müəllimlərin işə davamiyyəti ilə əlaqədar iradlarını bildirərək aşkar edilmiş nöqsanlarla bağlı tədbir görülməməsi müqabilində 300 manat məbləğində pul tələb etmişlər. Mayın 14-də Baş prokuror yanında Korrupsiyaya qarşı mübarizə idarəsinin əməkdaşları tərəfindən aparılmış əməliyyat tədbirləri nəticəsində qeyd edilən məbləğdə pulu mərkəzin direktoru D.Əliyevadan alarkən hər iki şəxs cinayət başında yaxalanmışlar. 

R.Mirmövsümovun idarə etdiyi “Opel Vita” markalı, 90-MF-574 dövlət qeydiyyat nişanlı avtomobilə baxış zamanı ibtidai istintaq üçün zəruri olan sənədlər aşkar edilərək maddi sübut kimi götürülmüş, həmçinin avtomaşının qabaq şüşəsinə «KORRUPSİYA» sözləri yazılmış lövhənin yapışdırıldığı müəyyən olunmuşdur. 

Faktla bağlı Cinayət Məcəlləsinin 178.2.1, 178.2.3 (dələduzluq) və 310-cu (vəzifəli şəxsin səlahiyyətlərini mənimsəmə) maddələri ilə cinayət işi başlanmış, X.Qurbanlı və R.Mirmövsümov iş üzrə təqsirləndirilən şəxs qismində cəlb edilməklə barələrində məhkəmənin qərarı ilə həbs qətimkan tədbiri seçilmişdir. 

Hazırda həmin şəxslər tərəfindən törədilmiş digər cinayətlərin müəyyənləşdirilməsi istiqamətində zəruri əməliyyat-istintaq tədbirləri davam etdirilir.