Sayt üzrə axtarış

















Əsas səhifə / XƏBƏRLƏR

2013-05-07
"Region Consult" MMC-nin direktorunun qanunsuz əməlləri ifşa edilmişdir

Bakı şəhərində fəaliyyət göstərən "Region Consult" Məhdud Məsuliyyətli Cəmiyyətin vəzifəli şəxslərinin qanunsuz hərəkətləri barədə Dövlət Miqrasiya Xidmətindən daxil olmuş materiallar Baş prokuror yanında Korrupsiyaya qarşı mübarizə idarəsində araşdırılmışdır.

Müəyyən edilmişdir ki, qeyd edilən cəmiyyətin təsisçisi və direktoru Tariyel Mirzoyev vəzifə səlahiyyətlərindən sui-istifadə edərək bir qrup yerli və xarici şirkətlərin ölkəmizə gətirdikləri əməkçi miqrantların haqqı ödənilən əmək fəaliyyətinə cəlb edilmələri üçün fərdi icazə almaları ilə əlaqədar Dövlət Miqrasiya Xidmətinə edilmiş müraciətlərin qısa müddət ərzində müsbət cavablandırılması öhdəliyini öz üzərinə götürmüşdür. Bundan sonra rəhbərlik etdiyi müəssisənin hesabına hər bir əcnəbi miqranta görə müvafiq miqdarda pul vəsaitinin ödənilməsinə nail olmaqla nəticədə dövlətin və vətəndaşların qanunla qorunan mənafelərinə mühüm zərər vurmuşdur.

Fakta görə Cinayət Məcəlləsinin 308.1-ci (vəzifə səlahiyyətlərindən sui-istifadə) maddəsi ilə ci­nayət işi başlanmışdır.

Hazırda cinayət işi üzrə vətəndaşlara vurulmuş ziyanın ödənilməsi və onların pozulmuş hüquqlarının bərpası istiqamətində zəruri istintaq-əməliyyat tədbirləri davam etdirilir.