Sayt üzrə axtarış

















Əsas səhifə / XƏBƏRLƏR

2013-02-05
Azərbaycan Respublikası Baş Prokurorluğunun Mətbuat xidmətinin məlumatı

"Azadlıq" qəzetinin 5 fevral 2013-cü il tarixli  sayında "Şamaxı da etiraz mitinqinə hazırlaşır" başlıqlı məqalədə cari il fevralın 20-də Şamaxı rayon İcra Hakimiyyətinin binasının qarşısında sosial problemlərin həll edilməməsi ilə bağlı mitinq keçiriləcəyi və bu barədə rəsmi müraciətin İcra  Hakimiyyətinə təqdim olunduğu barədə məlumat verilmişdir.

Baş Prokurorluqda aparılmış araşdırma ilə müəyyən edilmişdir ki, qəzetin redaksiyası tərəfindən obyektiv reallığa əsaslanmayan və "Natiq" adlı müəllifin qərəzli mövqeyini əks etdirən bu yazı ictimai rəyi çaşdırmağa, yalan məlumatları yaymaq yolu ilə bölgələrdə gərginlik şəraitini yaratmağa, son nəticədə isə  ölkədə ictimai-siyasi sabitliyin pozulmasına yönəldilmiş qanunsuz hərəkətlərdir. Araşdırmalarla həmçinin müəyyən edilmişdir ki, qeyd edilən tarixdə Şamaxı şəhərində mitinq keçiriləcəyi barədə rayon İcra Hakimiyyətinə heç bir müraciət daxil olmamış, etiraz mitinqinin keçirilməsinə hazırlıq getməsi barədə məlumat  öz təsdiqini tapmamışdır.

Qeyd edilənlərlə əlaqədar "Azadlıq" qəzetinin baş redaktorunun vəzifəsini icra edən baş redaktorun birinci müavini  Rahim Hacıyev Baş Prokurorluğa dəvət edilərək, "Prokurorluq haqqında" Qanunun tələblərinə müvafiq olaraq rəhbəri olduğu qəzetdə Azərbaycan Respublikasında ictimai-siyasi sabitliyin pozulması, ictimai rəyi çaşdırmaq məqsədilə heç bir əsası olmayan yalan məlumatların gələcəkdə dərc olunacağı təqdirdə, barəsində inzibati və cinayət məsuliyyəti də daxil olmaqla, qanunvericilikdə nəzərdə tutulmuş daha ciddi məsuliyyət tədbirləri görüləcəyi barədə rəsmi xəbərdarlıq edilmişdir.

Habelə, "Kütləvi informasiya vasitələri haqqında" Qanunun tələblərinə görə, yalan və qərəzli yazıları yaymaq, böhtan atmaq, yaxud digər qanunazidd əməllər törətmək məqsədilə kütləvi informasiya vasitələrindən istifadə olunmasına yolverilməzliyi diqqətə çatdırılmaqla, qanununa müvafiq olaraq həqiqətə uyğun olmayan informasiya barədə qəzetin növbəti sayında təkzib verilməsi tələb olunmuşdur.