Sayt üzrə axtarış

















Əsas səhifə / XƏBƏRLƏR

2013-01-17
Bakı şəhər prokurorluğu orqanları ötən ilin yekunlarını və qarşıda duran vəzifələri müzakirə etmişlər

Yanvarın 17-də Bakı şəhər prokurorluğunda mərkəzi aparatın və ərazi rayon (şəhər) prokurorluqları işçilərinin iştirakı ilə 2012-ci ildə cinayətkarlığa qarşı mübarizə, qanunçuluq və hüquq qaydasının möhkəmləndirilməsi, insan və vətəndaş hüquq və azadlıqlarının qorunması sahəsində görülmüş işlərin vəziyyəti və qarşıda duran vəzifələrin müzakirəsinə həsr olunmuş geniş əməliyyat müşavirəsi keçirilmişdir. 

Hesabat məruzəsi ilə çıxış edən Bakı şəhər prokuroru Əziz Seyidov Azərbaycan Respublikasının Prezidenti cənab İlham Əliyevin rəhbərliyi altında ölkəmizdə uğurla həyata keçirilən dövlətçilik siyasətinin məntiqi nəticəsi kimi iqtisadiyyatın dinamik inkişafının təmin edildiyini, ölkə qarşısında duran bütün vəzifələrin müvəffəqiyyətlə icra olunduğunu, qeyri-neft sektorunun 10 faiz artdığını, yoxsulluğun 6 faizə düşdüyünü, işsizliyin 5,2 faiz təşkil etməklə ötən il 100 mindən artıq yeni iş yerinin açıldığını, ictimai-siyasi sabitliyin dönməz xarakter almaqla əldə edilmiş nailiyyətlərin siyasi mühitin dayanıqlı olmasına və kriminogen durumun sabitləşməsinə müsbət təsirini, respublikamızın bölgədə və beynəlxalq aləmdə mövqelərinin əhəmiyyətli dərəcədə möhkəmlənməsini diqqətə çatdırmışdır. 

Bildirilmişdir ki, hesabat dövründə şəhərin prokurorluq orqanları tərəfindən cinayətkarlığa və hüquq pozuntularına qarşı mübarizə sahəsində paytaxtın digər hüquq mühafizə orqanları ilə əlaqəli şəkildə bir sıra tədbirlər keçirilərək müəyyən nəticələr əldə edilmişdir. Qeyd edilmişdir ki, 2011-ci illə müqayisədə hesabat dövründə şəhər üzrə 1597 hadisə və ya 14,1 faiz az - 9719 cinayət hadisəsi qeydə alınmış, onların açılması 5,8 faiz artaraq 79,1 faiz təşkil etmişdir. 

Göstərilmişdir ki, 2011-ci illə müqayisədə hesabat dövründə qəsdən adam öldürmə cinayətlərinin sayı 11 hadisə, bağlı qalmış quldurluq cinayətlərinin sayı 3 dəfə, bağlı qalmış ölümlə nəticələn yol nəqliyyat hadisələri 6 fakt azalmışdır. Hesabat dövründə şəhərin digər hüquq mühafizə orqanları ilə birgə fəaliyyəti nəticəsində çoxsaylı qəsdən adam öldürmə, quldurluq cinayətlərinin, bağlı qalmış ölümlə nəticələnən yol nəqliyyat hadisələrinin açılması təmin edilmiş, əvvəlki ilə nisbətən hesabat dövrundə qanunsuz narkotik vasitə və psixotrop maddələr dövriyyədən çıxarılmışdır. 

Şəhər prokurorluğu orqanları tərəfindən ibtidai araşdırmaya prosessual rəhbərlik sahəsində tələbkarlıq daha da artırılmış, istintaq və təhqiqatın tam, hərtərəfli və obyektiv aparılmasına nəzarət gücləndirilmiş, il ərzində prokurorluqda 531, daxili işlər orqanlarında isə 4104 cinayət işinin istintaqı yekunlaşdırılmaqla onların əksəriyyəti baxılması üçün aidiyyəti məhkəmələrə göndərilmişdir. 

2012-ci ildə əlaqəli şəkildə aparılmış istintaq və əməliyyat-axtarış tədbirləri nəticəsində 1996-cı ildə Cəlilabad şəhərində xəbərsiz itkin düşmüş hesab edilən V.Allahverdiyevin qısqanclıq zəminində, Xətai rayonunda Ə.Ağamirzəyevin, Nizami rayonunda Ə.Məmmədovanın naməlum şəraitdə tamah məqsədilə qətlə yetirilmələri kimi xüsusilə ağır cinayətlərin açılması təmin edilmişdir. Müşavirədə hesabat dövründə əldə edilmiş müsbət nəticələrlə yanaşı nöqsanlara da diqqət yetirilərək 2012-ci ildə qeydə alınmış 1 qəsdən adam öldürmə, 16 quldurluq, 10 ölümlə nəticələnən yol nəqliyyat hadisəsinin açılmaması narahatçılıq hissi ilə qeyd edilərək həmin işlərin tezliklə açılaraq təqsirkar şəxslərin məsuliyyətə cəlb edilməsi üçün intensiv və məqsədyönlü istintaq və əməliyyat-axtarış tədbirlərinin aparılmasının zəruriliyi vurğulanmışdır. Azərbaycan Respublikasının Prezidenti cənab İlham Əliyevin 26.12.2012-ci il tarixdə imzaladığı “Yol nəqliyyat hadisələri ilə əlaqədar təhlükəsizilk tədbirlərinin gücləndirilməsi və yol hərəkətinin tənzimlənməsi sahəsində idarəetmənin şəffaflığının artırılması ilə bağlı tədbirlər haqqında” Sərəncamla qarşıya qoyulmuş vəzifələrin qeyd-şərtsiz icrası, bu sahədə yol verilmiş qanun pozuntularının vaxtında aşkar edilib aradan qaldırılması üçün bütün zəruru tədbirlərin görülməsi hər bir əməkdaşdan tələb edilmişdir. 

Əziz Seyidov ağır və xüsusilə ağır cinayətlərin açılması üçün kriminalistika xidmətinin işinin daha da gücləndirilməsinin, vaxtında istintaq taktikasının və metodikasının, istintaq fərziyyələrinin düzgün qurulmasının vacibliyini qeyd etmişdir. 

Müşavirədə prokurorluq, istintaq və təhqiqat orqanlarının fəaliyyətində aşkar edilmiş nöqsanlar, qanun pozuntuları və süründürməçilik halları konkret misallar göstərilməklə təhlil edilib onların aradan qaldırılması tələb edilmişdir. 

Əməliyyat müşavirəsində şəhərin prokurorluq orqanları əməkdaşlarından əmək, xidməti və icra intizamına dəqiq və dürüst əməl etmələri tələb edilməklə vurğulanmışdır ki, hesabat dövründə bu sahədə yol verdikləri kobud pozuntulara görə şəhər prokurorluğunun 14 əməkdaşı intizam məsuliyyətinə cəlb olunmuş, o cümlədən 1 əməkdaş prokurorluq orqanlarından xaric edilmişdir. Müşavirədə vətəndaşların qəbulu, onların müraciətlərinə baxılması işinə xüsusi diqqət yetirilərək, bu sahədə yol verilən pozuntular konkret misallarla, belə pozuntulara görə intizam məsuliyyətinə cəlb edilmiş prokurorluq əməkdaşlarının adları açıqlanmaqla hər bir əməkdaşdan vətəndaşların qəbulu və onların müraciətlərinin araşdırılması işinə daha qayğı və həssaslıqla yanaşılması tələb olunmuşdur. 

Yekunda şəhər prokuroru Əziz Seyidov hər bir prokurorluq əməkdaşının prokurorluq orqanlarına dövlət səviyyəsində göstərilən böyük etimadı doğruldacağına, insan və vətəndaş hüquq və azadlıqlarının təmin edilməsi, cinayətkarlığa qarşı mübarizə, qanunçuluğun və hüquq qaydasının möhkəmləndirilməsi sahəsində öz qulluq və vəzifə borclarını layiqincə yerinə yetirəcəklərinə əminliyini ifadə etmişdir.